सधैं जस्तै यो पटकको दसैँ पनि नेपालीहरुका लागि रोचक बन्ने पक्का छ, अझै नेपाली फिल्म दर्शकको लागि दुई वटा राम्रा फिल्म हेर्न पाइने सम्भाबना पनि बढेको छ । सफल निर्माता र रेखाका पूर्बपति छविराज ओझाले निर्माण गरेको ‘लोफ़र’ संगै उनकी पूर्वपत्नी र छविले नै स्थापना गरेको रेखा फिल्मसको निर्माणमा बनेको ‘काली’ दसैंको फूलपातीका दिन एक साथ रिलिज हुने भएका छन् ।

करीब एक महिना अघिनै असोज २५ मा रिलिज गर्ने भनेर घोषणा भइ सकेको ‘लोफ़र’ संग भिडाउने उद्देश्यले रेखाले सोही दिन रिलिज मिती घोषणा  गरेको शंका गरिए पनि रेखाले भने आफुले भन्दा पनि समय नै तेस्तो भएको बताउछिन । कालीको कथा दसैंको बेलामा बढी सान्दर्भिक हुने भन्दै उनले दसैंको समय पारेर फिल्म रिलिज गर्ने निर्णय गरेको बताएकी छिन ।

छवि भने एकै दिन फिल्म रिलिज गर्न नहुने बताउछन र रेखालाई फिल्म जुधाउन कसैले उक्साएको जिकिर गर्दछन ।

फिल्म निर्माण ब्यापार भएकोले यसमा व्यक्तिगत रिसइबीको आधारमा निर्णयहरु गर्न नहुने जानकार हरु बताउछन । आशा गरौँ, फिल्म रिलिजको समय सम्ममा रेखा र छविको बिचमा सम्झौता भएर एउटामात्र फिल्म रिलिज होला !